Gen 14 | ZomZIV | STEP | Hih hun laitakin Shinar kumpipa Amraphel, Ellasar kumpipa Arioch, Elam kumpipa Kedorlaomer le Goiim kumpipa Tidal-te in

Genesis 14

Abram in Lot Hukhia

1 Hih hun laitakin Shinar ^{▼▼14.1 Tua pen Babylon gam tg. 9 ah zong.} kumpipa Amraphel, Ellasar kumpipa Arioch, Elam kumpipa Kedorlaomer le Goiim kumpipa Tidal-te in 2 Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber le Bela kumpite (tua pen Zoar) sim uh hi. 3 Hih a nununga kumpite in Siddim Kuam (Ci Tuipi) ^{▼▼14.3 Tua pen Si Tuipi} ah a galkapte uh a gawm uh hi. 4 Kum sawm le nih sung Kedorlaomer ukna nuai-ah om uh a, ahi hangin a kum sawm le thumna kumin lehdo uh hi. ^c

5 A kum sawm le lina kumin Kedorlaomer le amah tawh a kop kumpite kuankhia uh a, Ashteroth Karnaim a Rephai-te, Ham a Zuzim-te, Shaveh Kiriathaim a Emim-te 6 le Seir mualtung gama Hori mite zo in sehnel-gam kianga El Paran dong a zo uh hi. 7 Tua ciangin amaute kihei kik uh a En Mishpat (tua pen, Kadesh) ah pai-in Amalek mite gam buppi le Hazezon Tamar a teng Amor mite zo uh hi. ^d

8 Tua ciangin Sodom kumpipa, Gomorrah kumpipa Admah kumpipa, Zeboiim kumpipa, le Bela kumpipa (tua pen Zoar) - te kuankhia uh a Siddim Kuamah a galsim nading uh gelin 9 Elam kumpi, Kedorlaomer Goiim kumpi Tidal, Shinar kumpi Amraphel le Ellasar kumpi Arioch-te - kumpi li in kumpi nga sim uh hi. 10 Tua hunin Siddim Kuam teng Kultar khuk tawh kidima, Sodom le Gomorrah kumpite a tai uh ciangin a mite uh pawlkhat tuate sungah kia in, tua lo teng mual tungah tai uh hi. 11 Kumpi lite in Sodom le Gomorrah-te’ vante khempeuh, a ante khempeuh uh manin, tua ciangin a pai mang uh hi. 12 Amaute in Abram sanggampa tapa Lot, Sodom ah teng ahi manin a neihsate puakhia uh hi. ^e

13 A suakta mi khat in hih thu Hebrew mi Abram kiangah ko hi. Tu-in Eshcol le Aner-te’ sanggampa ^{▼▼14.13 Ahikeh mipih ahikeh beh} khat Amor mi Mamre neihsa singkung lianpite gei-ah Abram tenga, amaute khempeuh in Abram koppihte ahi uh hi. 14 Abram in a tanaupa uh sal-a kiman cih a zak ciangin ama inn sunga suak a kisinsa mi 318 samkhia a, Dan dong delh uh hi. 15 Zanin Abram in amaute sim dingin a mite khena, amaute vatgawpin Damascus leilu lama Hobah dong a zandelh hi. 16 Amah in vante khempeuh ngah kika, a tanaupa uh Lot, le a neihsate, numeite le midangte a ciahpih kik hi.

17 Abram in kumpi Kedorlaomer le a koppihte zo khina a ciah ciangin Shava Kuam (tua pen Kumpi Kuam) ah Sodom kumpipa amah dawn dingin kuankhia hi.

18 Tua khit ciangin Salem ^{▼▼14.18 Tua pen Jerusalem} kumpipa Melchizedek in anlum le lenggahzu a luikhia hi. Amah a Sang Pen Pasian’ siampi hi a, 19 Abram thupha pia in,

“Van le lei a Piangsakpa ^{▼▼14.19 Ahikeh Neipa tg. 22 ah zong.}
a Sang Pen Pasian in Abram, thupha pia henla,
20 Na galte na khut sunga hong piapa
a Sang Pen Pasian in thupha ^{▼▼14.20 Ahikeh kiphat} ngah ta hen,” a ci hi. ^j

Tua khit ciangin Abram in amah na khempeuhah sehsawm suah sehkhat pia hi. ^k

21 Sodom kumpipa in Abram kiangah, “A mite kei hong pia inla a vante nang tang in,” a ci hi.

22 Ahi hangin Abram in Sodom kumpipa kiangah, “Van le lei a Piangsakpa Sang Pen Pasian TOPA, tungah ka khut lamto in, 23 ‘Abram kei hauhsak hi,’ na cih khak loh nadingin nang tawh kisai na khat beek, khauzang khat ahikeh khedap khau nangawn ka la kei ding hi,” ci-in ka kiciam khin hi. 24 Ka mite neksate le kei tawh hong kuan khawm - Aner, Eshcol le Mamre te tanhte tawh kisai lo buang bangmah kong sang kei ding hi. Amaute amau tanh ciat lasak in,” a ci hi. ^l